BANYAK TAHU=JAGO

Lulus SMA lansung dadeng lanjut kulia, dia ambe jurusan bahasa inggiris di unima. Setiap hari dadeng pe kerja Cuma blajar blajar deng blajar lantaran dia inga dia pe mama’ ja pesan “kalu mo kulia ja ba butul-butul jang tu stenga-stenga! Ja inga tu orang tua pe suar lelah!” jadi dadeng pe pikiran Cuma di blajar. satu bulan so lewat dadeng so ja mulai kenal dunia kampus, apa lagi di fbs unima banyak organisasi kampus yang mo  beking pengetahuan lebeh mo ta tamba, dia dengar samua tu dia pe senior-senior ja bilang “kalu mo iko organisasi nyanda mo menyesal malahan mo dapa banyak pengetahuan baru kalu memang serius mo iko”. Di dalam hati pa dadeng “kapa mama’ deng papa’ nyanda kase mo iko organisasi? Ee’ kita mo coba jo mo iko ni organisasi kita mo lia bagimana dia pe pergerakan ini organisasi”.

Di kampus ini Dadeng  mulai iko organisasi, ada dia pe senior di organisasi bilang “kalu mo maso di organisasi ini musti iko pendidikan dasar tiga hari”! nda rekeng tiga dadeng bilang iyo pa dia pe senior lantaran dia suka skali mo tahu organisasi kampus. Tiga hari dia iko pendidikan dasar di kampus nda ja pulang kos, kong pas kiing dia pe pendidikan nyanda ada aer ja mandi akang. Pokoknya memang siksa mar dia pe materi ja kase memang sama deng ja mandi akang. di dalam hati pa dadeng “biar nda ja mandi yang penting kita mandi deng pengetahuan, kita pastikan nyanda ada di mata kulia ini materi”. Hari terakhir iko pendidikan dasar dadeng pe badan memang so gatal gara-gara nda ja mandi pe abis materi dadeng langsung pulang kos. Dia pe sampe di kos ada clieff di kamar kong dia bilang “kyapa nn kurang bobo bakasang ehh”? ini dadeng karu’ so malu kong dia bilang “nyanda ada kwa aer kita ja mandi akang  tiga hari ini! Mar kece’ biar bobo mar kita tiga hari da iko pendidikan da sama deng da kase mandi deng ilmu, kurang asal kase taru di pancurang tu badan langsung karu’ mandi yah, itu kiing dia pe seni biar kita nda ja mandi”.

Di kampus dia so ja mulai ba cirita deng dia pe tamang kalu ja iko pendidikan dasar memang gaga’ “andrew tu materi dorang ja kase torang nda ja dapa di dalam kelas”! dia so ja mulai kase bilang samua tu keuntungan ja iko organisasi kong Andrew bilang “nanti reeng kita mo coba mo maso di kostam” setiap ada kegiatan dadeng so ja mulai aktif, amper woong samua organisasi di kampus dadeng so maso deng memang ini dadeng pe rasa ingin tahu memang kuat kong ada kemauan jadi tu senior-senior memang semangat ja antar pa dadeng.

satu waktu ada orang ba bilang pa dia kalu suka mo iko organisasi membela rakyat ni dadeng ba debat deng tu orang yang ba pangge pa dia, dia pe maksud mo cari tau seluk beluk tu organisasi yang membela rakyat kalu bagimana, orang itu jelaskan yang mana ini organisasi luar kampus, oraganisasi ja perjuangkan rakyat yang pemerintah nda ja perhatikan, masyarakat so bersatu tolak perusahan yang mo ambe drang pe tanah mar pemerinta Cuma ja pura-pura akang, malah tare dorang Cuma ja bale bantu. Orang itu da jelaskan ona’ pa dadeng satu jam kong kelar, mar nda sia-sia dadeng lansung mangarti ini organisasi pe tujuan utama. Dia tapikir pa dia pe kampung ada perusahan luar da ambe drang pe tanah lantaran di sana ada emas, mar tu perusahan ini susah skali dorang ja kase kaluar lantaran tu perusahan ada izn dari pemerintah pa kita pe daerah. “kita nda abis pkir, kapa tu pemerintah disana da kase kaluar izin ba tambang tu perusahan itu? Abis dorang pake dorang kase tinggal samua tu limbah pa kita pe kampung, deng tu pemerintah pa kita pe kampung pa dorang pe pikiran Cuma ada doi.. doi... deng doi... dorang ambe keputusan nda ja libatkan masyarakat, akhirnya tare apa? serta masyarakat malawang kampung jadi nda tenang lantaran tu perusahan itu so ganggu depe ketenangan, tu pemerintah desa so nda ada lantaran dorang tako’ mo dapa pukul lantaran dia so jual tu masyarakat pe tanah”. Akhirnya dadeng pe tahu tu pergerakan oraganisasi itu membela rakyat dia langsung bilang pa orang yang ba pangge itu kalo dia suka mo maso di itu organisasi. deng, dia lebeh suka lagi ini oraganisasi nasional deng ba landas pancasila. Orang itu bilang sebelum mo maso di organisasi dadeng musti iko pendidikan dasar dulu di sekre’ blok D unima, lansung lagi ta timbul pa dadeng pe pikiran “huuu nda kireeng mo mandi kalu bagini!! Mar biar jo yang penting mandi ilmu” dadeng langsung bilang dia mo iko pendidikan dasar.
ternyata kote’ yang ja ba cirita deng dadeng itu ketua di oraganisasi itu kong dia pe ketua bilang “dadeng ba bawa beras ukuran ngana mo makang tiga hari deng dia pe par no”

“oh iyo nanti kita bawa. Mar nda ta kena deng kita pe kulia to”?

“nyanda yah trang mo pendidikan hari jumat, sabtu, deng minggu`”.

Abis ba cirita dadeng langsung pulang kos kong dia lanjut deng dia pe aktivitas.

Pas de pe hari pendidikan dadeng pigi di blok D, dia pe pigi kasana, dia lia so ada banyak orang di sekre’ lebeh dekat dia langsung dapa kenal dia jo reen pe tamang kampus budi, sandi, vicki, ziko deng aldi. Dia langsung kase ilang dia pe rasa malu lantaran dia pe tamang kampus jo samua. Pe sampe, dadeng langsung batanya “so mulai”? aldi langsug jawab “duduk jo krang ngana tu ja tunggu-tunggu”. Dadeng langsung duduk kong tunggu sadiki materi pertama iswadi kase depe judul filsafat revolusioner, samua simak itu materi  deng iswadi kiing ja kase materi nyanda ja sama deng oranag laeng ja managanto, ini dadeng semangat skali iswadi pe bilang “ada pertanyaan”? ni dadeng nda rekeng tiga dia langsung angka tangang. Kurang ona da kelar itu pendidikan dasar LMND so jam 01.00 wita depe ketua bilang pa dorang dadeng kalu dorang langsung jo tidor dari pagi-pagi materi so  mo lansung mulai.

Jam 05.00 subuh kita dengar ada orang ja baba toki di pintu di luar, lantaran masih pagi skali dorang blum suka mo bangong,, dadeng pe hoba di lubang kamar tu ja ba toki itu nenek, langsung ta pikir pa dadeng dorang ja bilang ada kata nenek ja ba pegang kata pokos-pokos kong jaba ambe tumbal kong tu orang-orang di  kampung pa nenek itu bakar akang rumah kong nenek kaluar kong so sampe di tondano kata tu nenek itu. Dadeng so batutu deng muka kong dia buka ulang tu batutu dia lia tu nenek so di muka padia ba tandu dua di kapala dadeng langsung bataria kong Jonathan sirang deng aer stenga ona gelas kong Jonathan bilang “bangong jo dadeng! Kurang ngana tu blum bangong, da bilang ona tadi malam mo bangong pagi-pagi”? dadeng karu langsung bangong kong dia pe lia kasana tu dia pe tamang-tamang so ja minum kopi. Kong Iswadi biilang “cepat jo torang so mo mulai tu materi hari kadua”. Dari jam 07.00 pagi sampe jam 12.00 malam dorang dadeng dapa materi trus Cuma mo istirahat kalu mo makang. Kong zico ba bise pa dadeng “deng so saki kita pe panta’ da baba duduk”! dadeng bilang “perhatikan jo trus tu ja ba kase materi ja bilang, ngana nda dapa rasa tu ngana pe panta’ so nda mo saki”.

Sampe kelar pendidikan dadeng deng da pe tamang-tamang ada iko kong, senior aflon bilang “hari senin torang mo praktek apa tu da dapa di pendidikan dasar ini jadi, ba kumpul jam 3 sore”! ni  dadeng so bingo mo praktek kata apa?? Abis kulia dadeng langsung cari pa dorang zico deng dia pe tamang-tamang laeng mo ba kumpul kong mo sama-sama mo iko praktek. akhirnya dorang sama-sama pigi kong dadeng pe lia di sekre’ so ada tu dorang ja bilang megafon deng dia peralatan laeng, dadeg so ja ba pikir kalu dorang mo demo mar, so jam 3,,,,.. dia pe penasaran so lebeh tinggi lantaran  dorang masih ja tunggu tu senior-senior ja iko pertemuan di kampus. So 2 jam ona da ba tunggu padorang nda datng-datang kong dadeng lia so ja ba cirita mo pulang tu laeng lantaran ada kata tugas dorang mo beking. Tunggu sadiki sandi bagini kamari pa dadeng “deng mari jo so mo pulang torang! Nda koreeng butul” dadeng karu’ bilang pa sandi yang mana “kalu dorang karu ada ona’ tugas yah kong sampe dorang nda ta datang” tunggu sadiki ba bunyi kamari tu hp kong dorang baca tu sms sama da tulis “kawan-kawan torang praktek jo besok dari kita ada diskusi di kampus deng tamang-tamang LMND laeng. Bangun kesadaran nasional, hentikan imperialisme”. Deng stenga kecewa dorang pulang.

Depe besok dorang lagi datang, Iswadi deng dia pe tamang –tamang so siap kong “sudah, so siap ngoni mo praktek?” Satu suara dorang bilang “sudah”. dorang kase ajar aba seting aksi yang mana depe praktek mo ba menuntut pasang lampu di kampus deng tamba bangunan di kampus. De pe titik aksi di fakultas–fakultas deng rektorat (kantor pusat unima) dorang so ja tunjung sapa korlap, sapa humas deng laeng-laeng. Pe siap samua dorang dadeng langsung ba jalang dorang pe mulai pertama di fbs kong vander so ja mulai kase praktek dia da dapa di pendidikan, sementara ba orasi  vander ofor lagi tu megafon pa billy rasa tako so masih jja iko reeng a billy. Akhirnya, dia masih ba tolak Cuma billy da da baca tu tuntutan. Samua fakultas dorang pigi akang, Dadeng masih tako mo pegang tu megafon blum ada kata percaya diri.

Pe sampe di titik aksi puncak di kantor pusat dadeng langsung abe tu megafon kong dia langsung mulai depe orasi, dia bilang samua apa tu tuntutan deng dia so ja tamba-tamba deng tuntututan laeng. Akhirnya ddi pihak rektorat kaluar kong dorang bilang dalam waktu dekat ini pembangunan kata so mo kase ba jalang, dari perbaikan kata jalang, bangunan, deng laeng-laeng yang masih kurang dorang so mo perbaiki.

Akhirnya da ba aksi ini ada hasil yang dorang dadeng dapa kong, dia pe titik aksi terakhir di muka bang BRI unima kong so ja mulai di situ tu da iko pendidikan langsung dorang abku ganti ja pegang tu megafon, dorang orasi sampe abis akang suara. Pe kelar aksi di situ, dadeng deng dia pe tamang-tamang langsung pulang di sekre’ kong langsung evaluasi. Pe evaluasi, apa samua tu da dapa capai deng apa samua tu blum tercapai. De pe hasil akhir memuaskan yang mana di capai yang mendominasi di situ. Pe akhir evaluasi dorang manyanyi lagu perjuangan LMND.