PANTUTU

Perjalanan ini hari mulai dari Tondei sampe di tondano. Kita da pulang so dari hari jumat lalu deng kebiasaan ja bale ulang di tondano kalu so hari minggu. Stenga 4 kita deng Iswan mulai perjalanan dari tondei mi turung ongkaw deng kita pe tenteres  Jupiter deng iswan pe karisma. Jalang tondei ka ongkaw yang so ja mulai beking itu beking senang tu perasaan setelah pe lama da ba tunggu gara-gara tu pembangunan stenga-stenga akhirnya depe stenga so ja mulai beking. Sempat kita engar waktu ba santai deng tamang-tamang waktu malam minggu kong dorang sempat singgung mengenai proyek pembuatan jalang ini yang so mulai dorang curiga tentang depe transparansi yang nda talalu jelas deng harusnya depe jalan mobeking 4 meter Cuma yang jadi dorang bilang Cuma 3 meter stenga. Ini salah satu kecurigaan tu tamang-tamang kampong yang so ja mulai ba pikir ni proyek tu stenga ja maso di popoji.

Stengah jam sto kami da tempu for mo sampe di Ongkaw. Pe sampe di ongkaw kami so sadiki senang gara-gara tu jalang so senang so nda sama deng pertema. Di perjalanan ini kami ba singga di kampong Sapa kong ada satu tampa yang kami ba singga kang di sistu ada situs peninggalan ato tampa bersejarah yang kalu mo di perhatikan itu sebenarnya boleh mo jadi tampa wisata. Batu kapal yang memang gaga kalu mo di  tata Cuma ni bupati nda pernah tapikir sampe situ mengenai itu situs yang harusnya torang jaga. Sadiki kami dapa info tu wilayah itu kata mo beking tambang mas pantasan reeng tu depe pinggir-pinggir dorang so pasang seng yang ja bap agar deng di situ so ada tulisan “dilarang masuk” pasti kalu memang butul dorang mob eking tambang tu wilayah itu, otomattis deng depe batu disitu dorang mo kase ancor. Disana kami Cuma da baba foto dri jalang lantaran nda boleh maso. Abis itu kami pe perjalanan so mo lanjut deng kami dua so sepakat moba singga di Tumpaan for mo lia tu waruga disana dari Iswa da dapa info kalu disana ada waruga. Di perjalanan ini kami da baku dapa deng ujang keras dara yesman memang kityare kalu kami nda da bawa mantel ujang so beku di atas motor kami.

Pe sampe di Tumpaan kami langsung cari tu waruga. Iswan s tahu depe info mar da selah jalang pertama, kami da maso di lorong kong di lorong itu so ja mulai banjir.

“boleh Tanya, dimana tu waruga disini?” iswan da ba Tanya pa cowo nda pake baju Cuma pake celana bola warna biru, ba itam sadiki dia deng depe rambu bela tenga.

“waruga?” jawab tu cowo itu. Dapa lia ini cowo nda tahu pa tu waruga soalnya dia so bale bingo deng apa tu Iswan ja bilang.

Iswan balas le “iyo waruga dang kubur tua itu”

“kubur tua? Nda ada ehh” dapa lia tu cowo pe pikiran so ja mulai ba jalang.

Kong ada tanta satu ba sampung “apa reen ngoni ja cari?” cowo itu langsung ba bilang kalu kami  ja cari waruga/kubur tua. Tanta yang da ba Tanya leh itu dapa lia rupa bingo-bingo busu. Akhirnya ada satu le tanta ba sambung kong dia blang “ngoni trus di jalang sana kong kalu dapa lia ada lorong mo belok kanan lewat jo disitu pokoknya ada greja di sei moba maso di lorong itu, di blakang greja tu waruga itu di dalam kintal.”

“oh iyo dang, makase neh tanta so bilang akang torang mo permisi dulu”           

Langsung kami pigi cari tu lorong yang tanta da bilang kong akhirnya lampu sein motor so ba sein kanan lantaran kami so dapa lia lorong moba maso kanan di seblah greja KGPM kalu nda salah. Pe maso di lorong itu kami langsung sse pelang tu otor kong lia di kiri kanan rumah-rumah. P ka tiga rumah ona kami da lia kong Iswan bilang deng dia pe kata isyarat pake tangang da mangada di kintl sblah kanan pa kami, kita pe bahaga di kanan “adoh so ini tu kai da cari-cari, mar kappa Cuma depe pantutu tu ada na?” di dalam hati pa kita.

Motor kami langsung parker di pinggir kong langsung maso di kintal itu deng rinte-rinte ba tamang kami maso ka dalam kintal ong Iswan so ja mulai foto tu waruga pe pantutu. Kog akhirnya ada tanta di rumah itu kaluar kong kami langsung batanya. “tanta, ini waruga memang keluarga disini?”

Tanta pe bahaga pa kami rupa aneh skal, rupa takotako mo bajawab ato bagimana, ato Cuma kit ape perasaan. Akhirnya tanta balas jawab “haaa kyapa reen? Iyo yah.”

“kalu boleh tahu ini waruga sapa?” balas Iswan.

“yah kita so nda tahu”

“depe tampa memang disini? Kong dia pe badang ada dimana?”

“iyo depe tampa memang disini, kong depe batu laeng kwa ada so taru di muka pas kwa ada acara disini tuhari kong se pindah”

Kami langsung bajalang ka muka for mo cari lia tu badan waruga yang dorang reeng so beking tampa bunga. Iswan mulai ja ambe gambar deng dia pe kamera. Abis kitia pake tu helem, kita pe ba haga ulang pa Iswan  so nda situ dia kong, tanta bilang “so  di rumah seblah dia cowo”

Kita Cuma ba tunggu di motor soalnya so dingin baba jalang, abis itu pe datang dia kong dia bilang “ada kire’eng batu tiwa disitu eh di seblah rumah ini. Bisa jadi tu waruga ini salah satu dakase badiri ni kampong, apareeng da kubur di seblah tumotowa.”

Pe kelar itu kami so moba ator mo kase trus tu perjalanan. Kita lia Iswan pe bahan so basa. “somo amper ta curah ni buku-buku” dia bilang pa kita.

“boleh kwa ehh, mar yang pentng gepe.”

“so mo baku  pisah reeng torang yah, kita so mo ka manado. Pelang-pelang jo kasana”

“iyo re’ yah”

Pe ba dapa prampatan arah ka manado deng tondano, kami karu langsung baku pisa dia da trus-trus kita da belok kanan arah ka tondano.

Tataaran, 02 oktober 14