Bota Vs Harvi

Bota Vs Harvi

Tu perjalanan ini kami mo pigi di aer terjun tekaan telu di tinoor. Tadi malam kitia da ba baku chating di feisbuk deng Alo Iswan kong kita bilang jam 10 jo kong torang ba jalang dari kita ada mo pigi di skolah waktu itu dari ada praktek, Alo Iswan balas dia bilang iyo. Pe pagi kita bangong so stenga 9 kong so nda ta pigi di skolah dari so terlambat. Kita buka feisbuk kong ba lia sapa tahu aktif tu Iswan pe Chat, mar memang reeng butul dia sementara ja ba feisbuk “so dimana?” kita coba ba Tanya pa Iswan. “kita so di bundaran, ngana di mana?”.

“oh iyo kita so mo pigi kasana”.

 nda rekeng tiga kita langsung pigi di kamar mandi kong cuci muka dari so nda mobakuriki dari tu Iswan so ja ba tunggu disana. Kita pe bale dari kamar mandi tu feisbuk kita blum da se mati “singga pa della” Iswan da balas. Kita pe singga pa Della, ternyata reeng tu Iswan pa Della pe kos. Dia karu’ reeng ja tunggu pa Della ja ba ator barang tu no bawa. Kita pe sampe Della langsung kase makang kong dia beking akang teh. Nehh, da smokol kitiare dulu.

Kitia bilang pa Iswan“Nda biasanya tu orang-orang itu so jam bagini blum datang nge” kong dia langsung jawab “sadiki lagi torang ba tunggu”. Jam depe jarom pendek so di 11 Iswan langsung bilang “torang so mo pigi mar nae jo bus torang mo ka tinoor soalnya Cuma torang 3 deng kiing so mo ujang”. Akhirnya kami nae bus kong di tomohon kitia lia Iswan pe hape so ba bunyi, kita mo coba mo pasang bae-bae tu telinga kong mo dengar sapa tu ja ba cirita deng dia mar nda ja dapa dengar Cuma kitia pe curiga itu dorang Jufri. Kong Iswan “so di jalang kawangkoaan dorang Jufri mar kitia da bilang nanti torang tunggu di persimpangan ka Tinoor”. Awo ture’e, ternyata kitia pe filing kuat jo reeng, memang reeng dorang yah.

Pe sampe di Tinoor kami langsung cari tampa mo ba sombar akang dari ujang kras, kong kami pigi di pangkalan ompreng untung bae Cuma sadiki tu ompreng da ba tinggal di pangkalan neh da dapa tampa jo kitiare  kami. So satu jam da baba duduk kong Della bilang “sana tu Charli, da ba bili di warong” kong kita coba ba hoba dari jao rupa dapa lia Charli pe gaya yah. Kitia coba ba dekat pa dorang kitia mo lia kalu it memang Charli ato nyanda mar, memang reeng nyanda yah kong kitia pe bahaga kanan “Dinan, dari mana ngana?” kitia so kase pasti itu Dinan neh nda rekeng tiga kita langsung tegor. Deng gaya ta kage kong dia haga dulu ona 3 detik baru dia balas kalu dia kata dari beskem. Kong dia bilang banyak orang kata disana dorang kine da datang ba bli dari so abis akang logistik. “nanti jo sama-sama torang ka bawa” di dalam hati pa kitia “ehh mujur tare’ kami, ada tu mo ba antar” :D dorang iko deng kitia pigi di pangkalan ompreng kong baba tunggu lagi pa tu Jufri. Kalu nda salah so 3 jam ona’ kami da ba tunggu pa dorang kong Dinan bilang “torang jo ba tunggu di pos situ supaya dorang mo dap alia jelas torang. Rupa jo kiing butul depe usulan deng tu ujang kiing so ja mulai brentineh kami langsung iko akang dorang da bilang mo bajaga jo di pos di seblah. Pe lima menit da ba tunggu muncul Kamari tu dua kurianga’ itu Jufri deng Charles. “sorry da terlambat kami”. Dorang pe sampe langsung kami ba siap mo turung pigi di beskem .10 menit ona’ depe perjalanan kong kami sampe, dapa lia wo’ong so nda ada tampa kami mo ba diri akang tenda mar ada jo reeng. Oh waktu itu reeng deng Apid deng Tian da ba sama-sama deng kami Cuma dari Tinoor.

Tenda kami so ja mulai kase badiri deng waktu itu mo reyen ki’ing Jufri pe tenda baru dia beli. Neh tu KPA TUMONDEI so dua kitiare tenda. :D tenda pe klar ta badiri kai langsung cari kayu api kong dorang Apid ki’ing pe tenda so ta badiri Cuma beda ona 10 meter deng kami. Kayu api pe ta kumpul langsung ba siap mo beking makang malam dari kami blum ada konfor mar, K’Iswan bilang nyanda jo kiing gaga’ ja pake kata konfor dari pe klar pake depe botol gas langsung ja buang kacuali kata kalu mo bawa pulang ulang depe botol Cuma jarang kata orang yang ja bawa pulang ulang tu botol gas.

Depe besok kami lamhsung basiap mo pigi di aer terjun depe jalang memang karu’ dapa tako ja lia yah, ba pece ki’ing kong miring skali depe jalang. Kalu  nda konsentrasi bae-bae kurang mo pigi ambe di bawa. Akhirnya pe sampe di kuala aer terjun langsung kase semangat baru pa kami. Cuma depe slek kitia so rasa be*a’ (sensor) :D pokoknya so saki puru kong langsung cari aman for mo kase ilang itu saki puru. Abis itu kita langsung bale pa dorang kong baba foto. Nda lama disitu kami langsung pigi di tepaan telu kalu nda salah 7 menit ona’ tu perjalananan ba lawan arus kong mo dapa itu aer terjun paling gaga. Kami pe sampe memang karu’ gaga yah ada 4 aer terjun da ba sambut pa kami, kitia kine da ba rencana nyanda mo ba basah mar apa boleh buat so basa lagi. :D disana kami bafoto trus sampe so ada tu orang-orang laeng so ja ba datang (KPA laeng) kong ta slak baku dapa deng tu tamang da sama-sama dulu waktu kami da nae gunung soputan mar depe slek kitia so nda tahu depe nama kong Cuma ki’ing da ba cirita sadiki kita deng dia kong so mo bale beskem kami.

Pe sampe di beskem, kami langsung ba beking makang siang depe menu supermie deng nasi mar Iswan bilang kita jo kata tu mo beking dari dia da beking nasi so dua kali Cuma ja angus trus. Nasi pe jadi kami so mo makang kong pe abis makang dorang,  dorang pinjam tu kitia pe kamera yang da pake baba foto tadi, dorang kata mo lia kalu gaga ato nda. Sementara kitia ja makang kitia lia tu tamang satu yang dorang ja pangge bota rupa so lapar kong kitia pangge, pertama dia pura-pura ja jual mahal, so kenyang kine mar kitia pe lapas piring dia langsung ba bilang dia kata mob a beking supermie neh mo pinjam kata blangang goreng. Kong kitia langsung manyau kasana “bota, masih banyak tu mie sana ehh makang jo! Dari pada Cuma mo buang” pe denggar itu, dialangsung ambe kong dia makang deng nasi. Ini bota k’Iswanja bilang kalu di Tondei sama deng Harvi Sondakh kong kitia perhatikan memang reeng ada jo kemiripan yahhh Cuma Harvi di Sanggar Tumondei Minahasa Selatan (STMS) mar, Bota Pecinta alam. Mar biar jo, samua ada tanggung jawab masing-masing bota di alam harvi di budaya local, yang penting dua-dua sama-sama mo jaga.

Pe klar makang tu bota kitia langsung ambe tu kamera dari o moba peking kong so mo bale tondano. Kita pe pasang tu kamera kong ta tulis “no picture” kitia pe lia itu, reee so tema’im ini, so ilang samua tu foto-foto di aer.dorang k”iswan ta kage “haaa… kappa so nda ada?” Cuma biar jo. L

Abis itu kami bap eking kong bajalang kaki ka arah jalan besar kong ba D.O deri tinoor sampe Tomohon kong turung di dekat bundaran patong  Tololiu. Kong ba D.O lagi Tomohon sampe Tataaaran.

Mei 2014