PUAS

Sekitar  jam 6 pagi kita ta bangong lantaran saki puru. Capat-capat  pigi di wese kong pigi bera’, 10 menit di dalam wese da kaluar deng puru legah deng rasa Suasana pagi di rumah memang enak lantaran baru datang dari perkemahan di Tombatu. kita langsung cars tu leptop deng hp. Nda riki brapa menit da cars datang kamari motor Honda  karisma yang nda asing dia pe ba bunyi pa kita pe telinga. kita buka pintu ternyata nda salah kita pe perkiraan bujangan Tondei satu deng gaya topi ala taong 80an di muka rumah. “manjo mo so mo pigi” dengar itu kita langsung inga kita da beking janji mo ka Tompaso mo pigi di festival pinawetengan mo lia tu budaya yang so ja mulai dorang kase lupa, apalagi tu anak-anak muda Tondei So nda ada ona budaya minahasa tu dorang tahu padahal tinggal di tanah minahasa. “Perasaan kita da beking janji mo pigi sama-sama tadi malam ato dia so lupa ato da ta tidor gara-gara lalah di perjalan dari perkemahan pemuda Gmim”.  Rasa penasaran kuat skali pa kita sampe kita semangat skali mo pigi lia tu festival itu. “smokol dulu kong pigi jang Cuma kiing mo cari saki” kita pe papa’ bilang. Blum ba jalang kita pe mama’ so ambe akang nasi mo smokol akang dia pe par ikang tikus. “manjo tare smokol dulu!” kita pe mama pangge pa Ito. Lantaran  mo cepat ona’ ato nda biasa ja smokol pagi sampe Ito’ bilang sudah jo kata. Kita lia jam so stenga tuju kong Ito’ langsung pangge supaya so mo ba jalang.

Kami pe perjalanan mo ka Tompaso lewat Ongkaw, jalang sama deng kuala kering punung deng batu-batu timbul. Dulu waktu jaman ja ba caleg deng calon bupati banyak skali tu  da ba janji mo beking tu jalang ini serta dorang jadi kurang sama deng dorang nda tahu tu jalang itu deng dorang pe janji. Deng sebenarnya pemerintah musti beking tu jalang ini mar, sama deng dorang Cuma ja bale akang panta ato ja maso pa dorang pe popoji tu doi mo kase beking tu jalang. Kita lia Ito’ pepanta so rupa so saki lantaran tata tada tu motor “memang karu ini honda karisma so banyak jasa da kase pa Ito’ ka mana-mana tu Ito’ dia ja antar”. so satu jam ona’ di jalang Tondei-Ongkaw akhirnya kami sampe di  di Ongkaw padahal, Cuma woong 15 menit kalu jalang gaga’. Akhirnya dari ongkaw perjalanan langsung tembak Tompaso lama. Pante jadi tamang pa kita deng Ito sampe di amurang dapa lia memang gaga’ skali mar so banyak skali kotoran di pante. Nda dapa rasa kami pe perjalanan so sampe di Kawangkoan rasa penasaran so lebe kuat lantaran so nda sabar mo lia tu pertunjukan di watu pinawetengan deng pa Mamoto pe tampa.

Lima menit ona’ dari Kawangkoaan Honda karisma so sampe di di tampa da tulis akang institute seni  dan budaya Sulawesi utara. Depe tampa memang karu gaga yah, depe muka ada trompet raksasa dorang da pake pecakan rekor di waktu sail bunaken tu hari. “paling mati kamari tu Mamoto so nda ada tu mo sama deng dia pe pemerhati budaya” Ito bilang pa kita. Turung dari motor kita deng Ito’ langsung bajlang ba dekat pa tanta ja ba jual makanan “ngana Tanya pa tanta sana kalu tu acara pertama di pinawetangan ato di  tampa ini.” Langsung kita pigi Tanya pa tanta yang jaba jual di sekitar situ kong tanta bilang tu acara kata pertama mo mulai di tampa itu. Langsung kita deng ito’ maso di tampa kong lia di sana ada ibadah peresmian gereja, langsung kita deng Ito’ba cari tampa mo ba sombarakang lantaran panas so lebe ja ba cucu di kuli.

Satu jam ona da ba tunggu kong kami lia tu acara ibadah so kelar. langsung dapa dengar suara di toa ja bilang kalo pengisi acara langsung pigi di tampa mo pawai akang ato di tampa star kong depe finis di institute seni deng budaya di tampa kami ja ba diri akang ini. Dapa lia tu waraney-waraney soja ba sadia mo pigi pawai deng tu tarian patokaan dari kampung-kampung sekiitar deng tu undangan dorang da undang. Trompet besar di muka so ba bunyi tanda kalu tu pawai so mulai. Lima blas menit ona’kami ba tunggu tu peserta mo sampe di garis finis. Sampe so satu jam kami da tunggu, tu pawai nda datang-datang. Akhirnya tu da tunggu mo datang so datang. Deng gayagaya minahasa dulu peserta pawai memang gaga skali ja lia, sama deng da ta bale tu di jaman dulu. “jadi bagini dang tu minahasa pe model dulu”. finis pertama tu waraney-waraney.

9 July 2013