Laman

Rabu, 23 November 2016

MA’WERUNUBAT



Hari ini, kita pe mama’ deng papa da pigi di kiawa dari ada acara keluarga, Kita sandiri tinggal di rumah sandirian nda tahu ba apa, kita ator rumah lantaran so sama deng kapal picah. deng putar lagu metal kita ba bersih di rumah kong abis itu kita langsung pigi di lapangan dari kebetulan kita ta maso di panitia yang da beking kegiatan. Di situ, tu pertandingan memang dapa lia panas dari so maso di putaran ka dua jadi, tu persaingan memang dapa rasa skali di ini hari. Satu kali tu pemain yang di tim satu ba rucipa dia pe lawan kong tu ja ba kase semangat pa tim yang da ta ruju itu nda trima deng  itu kong jadi masalah akhirnya dorang bakalae kong kebetulan itu pertandingan antar kampong. Tu penonton so jadi kacau lantaran ada tu ja ba profokator di situ sampe dorang bakalae, akhirnya tu hangsip-hangsip kase aman dorang kuntua sampe turung tangan da kase aman pa dorang.
“pantasan ini Indonesia nda mo berkembang-berkembang, sedangkan reeng Cuma kegiatan bagini so nda sportif apa lagi di pertandingan besar. Ini ona tu salah satu tu pejabat-pejabat ja kase tunjung kong sampe depe masyarakat bagini.” Kong, kebetulan kita pe mama ta maso di salah satu yang ba pegang jabatan di pemerintah desa, pas di makang malam tadi malam kami baba cirita kong nda tahu da ta bagimana sampe ta angka cirita mengenai pemerintah kong sampe kita pe mama bilang kalu pemerintah di daerah sini ada kegiatan for tu pejabat-pejabat yang sama deng kita pe mama da pegang di desa skarang.
“ehh… tamber da bilang pa mama samua musti mo pigi di singapur dari so di anggarkan torang mo kasana.”
“ada kegiatan apa reeng ma’ dari mo kasana?” kita coba Tanya.”
Kong kita pe mama’ jaab
“Cuma mo jalang-jalang yah…. Memang karu torang pe ibu skrang memang pang bae, taat di agama, rajin pi greja, kong baba bantu karu’ pa masyarakat.”
Kita pe dengar kitape mama pe model ba cirita itu, di dalam hati pa kita ja rasa kasiang deng doraang yang so ja kase beking bodok dorang nda tahu ato pura-pura nda tahu
“ooo rekey aku kengsya sa kelesi’i?”
Pe klar pertandingan bola yang nda ta turus itu, kita langsung pulang rumah kong ba uni televise. nda lama ba uni Lolombulan datang
“nda mo ibdah reeng ngana?” Lolombulan Tanya.
“haaaa? Oh iyo, tunggu dang kita mo baganti.”
Di ibadah ada drama yang dorang kase tunjung mengenai tu Tete Manis pe lahir di kandang kong ada orang majus ja pi bawa persembahan. Kebetulan kwa da merayakan natal to jadi, dorang kase tunjung bagitu. Kong langsung dorang maso di jaman skrang tu natal kata dorang so ja pake di nda butul. Samua tu nda gaga dorang kase tunjung dari so ada bukti memang so lari jao dari makna natal.
Pas pe klar ba hotba somo kase persembahan. sementara lagu manyanyi kong ba kore kamari tu laki-laki da pake jeket kuli, nda talalu tinggi kong pake topi sama deng baret di pramuka.
“ehhh… ngana suka mo iko ka bawa? Dari ada rapat for mo beking kegiatan taun baru?”
Dapa rasa tu da bicara pe suara nda asing pa kitape telinga. Kong kita langsung bale blakang
“ba apa di bawa ka’?” ternyata reeng tu da bicara itu Toar kita pe kaka. Dia nda sampe jawab mo ba apa kong kita langsung pangge pa Lolombulan supaya mo iko deng kami mo ka bawa. Nda rekeng tiga tu motor king deng karisma so kabawa. Pe sampe di tampa kami mo ba cirita akang, Lolombulan tu dimuka kong dia lia ada satu klompok di dalam rumah ja bagate kampion kong kita Tanya pa Toar kalu memang ini tu tampa mo rapat akang dari di kapala pakita kalu mo rapat ada pimpinan rapat kong ada ahhh yang penting di kapala pa kita formal. Kong Toar langsung jawab
“nda salah tampa torang yah, memang kwa disini torang mo rapat akang”
Kita lia tu orang-orang disitu memang so ja miring-miring jaba  seri kong dapa dengar suara dari dalam “ehh maso jo so mo mulai torang”
“Morapat ini ato mo bagate?” di dalam hati pa kita. Yah dorang so pangge kami terpaksa kami maso lantaran ada kegiatan kata mo beking taun baru, kong om satu bilang pa kami taun baru dorang mo angka tu budaya so lama da ilang tu Ma’rantong kata. Kita pe dengar itu kita langsung senang da dengar dari masih ada orang-orang tua ja peduli deng budaya, apalagi budaya di kampong sandiri. Kong satu om bacirita depe  konsep yang mo pake di acara kong beking tim kerja dari tu kegiatan itu ada jo dana mo pake.
“kalu mengenai dana jang tako ada kwa doi nanti kita pe tahu itu” om Ampel bilang.
Baba cirita-babacirita kong sampe di pengenal kata supaya mo dapa tahu sapa yang da beking ini kegiatan musti ada kartu pengenal ato kartu panitia, kong om Ampel langsung bilang “kyapa kwa mo pake-pake baba gitu! Torang ini mo angka tu budaya kalu mo pake bagitu so modern”
Di dalam hati pa kita bilang ada jo kiing dia pe butul tu Om Ampel da bilang. Kong kita bilang “kalu mo beking baju musti pake warna merah dari itu tu identik deng torang pe minahasa” Lolombulan deng Toar bilang iyo dari budaya minahasa yang di kenal banya orang warna merah kong itu memang kita da se lambang waraney ato brani. Pe dengar tu kami da bilang tadi kong om Ampel langsung bilang
“ehhh warna kuning jo dari itu tu gaga”
Om Ampel ona’ reeng nda tahu ato baimana kyapa dia suka warna kuning kong dia so stenga ba paksa musti warna kuning. Kong tu perdebatan warna  nda sampe klar kong dorang langsung sambung deng masalah laeng sampe jam 12 malam tucirita baru klar langsung kita, Toar deng Lolombulan langsung ba bilang pulang dari so lat kong kebetulan kami pe arah mo pulang sama. Pe di muka rumah pa kita Toar bilang ada kata dia mo bilang jadi kami ba singga di muka rumah yang ada pagar beton itu.
“kita so tahu dorang mo pergunakan torang lantaran torang di bagian budaya torang pe kerja.” Toar bilang pa kami.
“kita so curiga dari pertama kali Om Ampel bilang kalu soal dana kata nda perlu tako nanti kata dia urus. Pa kita pe pikiran so lebe kita curiga lagi tu dia da bilang mengenai kaeng kata mo pake supaya sragam musti pake warna kuning. Apa depe sangkut paut minahasa deng kuning? Sedangkan yang seharusnya musti merah” Lolombulan bilang. Kong kita sambung depe cirita ada depe sama deng Lolombulan da bilang kita langsung bilang pa Toar deng Lolombulan “sudah jo kase trus dari mo beking rusak torang pe organisasi kalu mokase trus”
Lolombulan lagi langsung bilang stuju tu kita pe usulan yang da kase itu kurang mo tunggu pa Toar dari dia kami pe Tonaas Wangko. Cuma dia bilang “kalu menurut kita torang jangang mundur. Kalu dorang pergunakan pa torang torang bale pergunakan pa dorang deng ini acara dorang kase pa torang depe konsep jadi nanti kita ator kalu mo bagimana yang pasti torang beking ini acara dapa lia torang yang beking kong sekaligus lagi torang kase kenal  pa dorang torang pe organisasi ini.”
Kita deng Lolombulan ba pikir sadiki, kong akhirnya kami pikir-pikir ada depe butul tu Toar da bilang kong Lolombulan langsung sambung “kalu bagitu reeng torang musti bilang pa tamang-tamang laeng musti pake merah Cuma bukang torang berpihak pa merah. Merah kita pe maksud merah melambangkan torang ini Minahasa” nda rekeng tiga kita deng Toar langsung bilang spakat. Pe klar itu kami so mo pulang tidor. Cuma kita pe pulang rumah kita pe mama deng papa masih da sementara ba uni, Cuma ta pe papa so sadiki ta goyang alias mabo. Sampe kasana kita langsung ambe nasi for mo makang lantaran kita pe biasa ja makang kalu so mo tidor. Trus nda tahu da ta bagimana sampe tu cirita ta sampe di cirita-cirita lama kong kita Tanya pa papa’ kalu pernah iko ma’ weru nubat kebetulan kita baru dengar pa Toar da cirita mengenai itu. Itu kata sama deng pesta cuma so nda ja beking lantaran dorang bilang sesat. Sesat? Kalu kita dengar cirita dari pa Toar justru sama deng kita pe agama ja beking tu perjamuan Cuma kalu ma’ weru nubat ada depe mistis tu jaba pimpin itu ada ja ba dukung akang Cuma beda apa deng di kkr kong orang ja kepenuhan kong ja bahasa roh? Di ma’weru nubat kata jaba dukung tu apo-apo kong jaba pesan tu bagus-bagus kong jaba kase bae orang depe bukti sampe kata di daerah bitung ja datang ba ubah di situ. Deng dulu kata tu jaba pegang wentel musti lapas di muka samua kong meja kong tu pemimpin mo kase berdoa supaya mo bagus-bagus. Kong kalu kata so ada tu ja mulai ba jahat ato ja pake di nda bagus depe wentel mo ciri di meja yang dorang da taru akang. Kalu kata ada tu bagitu tu pemimpin mo bacirta akang sampe dia mo marah lantaran so ja pake di nda bagus.
Kita dengar lagi kita pe papa’ ba cirita memang sama deng Toar ja bilang kong kita pe papa’ ki’ing pernah iko ma’weru nubat ja iko deng kita pe kundu kata dulu deng tamba ki’ing tu jaba pimpin kata dulu satu garis keturunan deng kita deng dorang Toar.
Dengar cirita pa Toar deng papa’ ternyata ada yang memang mo kase ilang tu taradisi bagitu padahal apa tu salah disitu? Skrang kita lia so banya orang ja kurung tu Tuhan di Kristen ato ja kurung tu Tuhan di dalam greja kong bilang tu hal-hal sama deng ma’weru nubat sesat kata. Mar skrang kami pe tujuan mo kase kembang ulang tu ma’weru nubat.

                                               

                                                       04 Januari 2014

Tidak ada komentar: